Stærsti sjónvarpsskjár á Norðurlöndum

Hilsen:

Vona að landsmenn fjarlægir sem nálægir hafi átt góða jólahátíð. Var nú ekkert farið að lítast á fréttirnar að heiman, með öllu vatnsveðrinu, stormum, og almennt yfirdrifnu fárviðri sem virðist hafa geisað heima. Hér hefur varla bært hár á höfði, og í gær eftir að hafa snætt góðan mat, nautakjöt með meðlæti og kjúklinga á kinverskan máta, þá var ákveðið eftir góða hvíld að rölta niður í miðbæ og tékka á lífinu. Þar sem við vorum eingöngu þrjú sem vorum eftir af öllum alþjóðlegu stúdentunum, þá fannst okkur viðeigandi að bregða okkur í bæinn, enda vön öðrum siðum að heiman. Um tíma frá 11 um kvöldið vorum við einu hræðurnar í bænum, og eftir að hafa rúntað um helstu verslunargötu Esbjerg var ákveðið að kíkja inn á eina barinn sem var opinn. Þar inni sátu nokkrir sem greinilega höfðu engan heim að sækja, og eftir stutta stund settist hjá okkur norskur sjómaður, sem var óðara upptekinn við að sannfæra slóvönsku stelpuna, Martinu um að heimsækja sig, þó giftur væri. Hún var náttúrulega kurteisin uppmáluð, en eftir að hafa setið stutta stund á spjalli við hann, fannst henni tímabært að við færum annað. Hún hafði áhuga á að komast í miðnæturmessu, enda vön því að heiman að fara í messu með foreldrum sínum. Við höfðum fyrr um kvöldið gengið fram hjá kirkju þar sem auglýst var miðnæturmessa. Við náðum tímanllega og vorum fyrst í vafa, þar sem meirihluti kirkjugesta var frá Asíulöndum, og inn á milli væntanlega vinir og vandamenn. Við settumst inn og hlýddum á messuna, og má eiginlega segja að presturinn sem stjórnaði henni var mjög sérstakur, í staðinn fyrir að standa í púlti gekki hann um gólf og með miklum tilþrifum á dönsku lýsti hann eiginleikum jólanóttarinnar, með aðstoð ungra barna og aðstoðarmanna. Að mörgu leyti var þetta mjög notalegt að setjast um stutta stund inn og hlusta á guðsorð, og þegar leið að lokum messunnar var Heims um ból sungið á dönsku.

Eftirá kíktum við aftur í miðbæinn, og þá var annað um að lítast, göturnar fullar af fólki og staðirnir að fyllast af fólki, líkt og um venjulegan laugardag væri að ræða. Við fundum einn þægilegan stað og sátum þar um stutta stund áður en heim var haldið á leið.

'EG rak  augun í það að til stendur að byggja einn stærsta risaskjá utan á byggingu einni sem stendur við Ráðhústorgið í Kaupmannahöfn. Bygging þessi hefur löngum verið mikill þyrnir í augum dana, þar sem framhlið hennar er skreytt með ljósaskiltum frá hinum og þessum fyrirtækjum, og sjálfur hef ég oft veitt þessarri byggingu athygli enda annað ekki hægt. En nú eru uppi áform um að byggja framan á bygginguna  risaskjá, 500 fermetrar, þar sem hægt verður að fylgjast stórviðburðum hvort sem um er að ræða í íþróttum eða tónlist. Með þessu móti vilja menn nýta sér margmiðlunarmöguleikana, til að geta miðlað um leið upplýsingum og lifandi auglýsingum.

Jæja læt þetta nægja í bili, enda framundan að snæða restarnar af nautakjötinu og öllu meðlætinu ásamt góðu rauðvini sem keypt var í Nettó fyrir 40 dkr.

Hilsen

Gilli

Gleðileg jól

Sæl verið þið:

Þá er runninn upp minn 46ti aðfangadagur og verður að segjast að harla man ég eftir minni fyrstu jóalgjöf, en einhvers staðar í minningabankanum eru gjafir eins og snjóþota, norskur sleði með sæti og handfangi og svo stóð maður fyrir aftan sætið ofan á járninu og ýtti sér áfram. Þar að auki man ég eftir að hafa fengið Matchbox bílabraut, átthyrnd, enda var hún notuð óspart þau jólin, eða þangað til batteríin kláruðust. Þá beindist athyglin að einhverju öðru. Oftast nær þegar spurt var hvað ég vildi, þá var ég nokkuð ákveðinn, bækur, og þá helst bækurnar eftir Enid Blyton, um hin fimm fræknu. Þetta voru uppáhaldssögurnar mínar, ævintýri og spæjaragátur. Svo er í minningunni jól þar sem gjafirnar hafa verið minni, en samt þýðingarmeiri, og um tíma þegar frændi minn og nafni lifði var ég best klæddi maðurinn eftir gjafaflóðið frá honum. Nú hin síðari ár eru jólin komin með annan merkisblæ, í huga mínum meira tengt mat, slökun og lestur bóka og áhorf mynddiska. Svona breytist þetta.

'Aðuren ég slútta  þessu bloggi, þá langar mig að hefja hér upptalningu á merkilegum staðreyndum varðandi bardagahetjuna miklu, Chuck Norris goðið sjálft, og ég veit ekki hvað ég get hafið manninn meira til skýjanna.

Hér eru fyrstu molarnir, lauslega þýddir úr ensku:

1. Tárin hans Chuck Norris geta læknað krabbamein. Slæmt er þó að hann hefur aldrei grátið. Aldrei

2. Chuck Norris sefur ekki. Hann bíður átekta.

3. Aðalútflutningsvara Chuck Norris er sársauki

4. Chuck Norris hefur talið til eílífðar. Tvisvar

5. Chuck Norris fer ekki á veiðar, þar sem orðið  gefur til kynna möguleika á að mistakast. Chuck fer frekar út og drepur.

6.Það er engin kinn undir skeggi Chuck Norris. Þetta er eingöngu annar hnefi.

Læt þetta duga að sinni.

 

Hilsen og eigið gleðilega hátíð.

Með þökk fyrir lesturinn og allar athugasemdir sem borist hafa.

Gilli

Jólagjöfin í ár

Hilsen:

Hvernig væri nú að flikka upp á húsgögnin heima, og koma með nýtt lúkk? Kíkið á þessa heimasíðu, þetta eru sko klikkuð húsgögn, er ekki viss um að þau muni vekja mikla lukku hjá veikara kyninu.

www.sexyfurniture.nl

Hér eru sýnishorn:

 

Þetta er spurning um djörfung ekki satt?

Hilsen

Gilli

Svínslegt

Jæja sæl verið þið:

'Oðum nálgast jólin. Hér er grá jörð, hiti og almennt mjög gott veður. Það er löngu búið að slá af að hér muni hvít jörð fagna landsmönnum á aðfangadag eða yfirleitt í kringum jólahátíðina. Verður að segjast eins og er fyrir íslending eins og mig þá veit maður ekki hvort maður á að kætast eða leggjast í sorg yfir því að hafa ekki snæhvíta mjöllina með öllu sínu frosti og  kulda. Að vissu leyti söknuður en um leið áhyggjur yfir framhaldinu, þ.e hvað tekur við eftir áramót.

Mínar áhyggjur eru þó smáar í samanburði við áhyggjurnar sem danir hafa yfir nýjustu útspili dansks  listamannahóps sem settni nýverið auglýsingu í Teheran Times í 'Iran þar sem við fyrstu sýn sem hópurinn virðist styðja baráttu Írana fyrir kjarnorkuvinnslu. En þegar betur er að gáð,  þá mynda fyrstu upphafstafirnir úr auglýsingunni þegar þeir eru settir saman orðið SWINE. Og það er ekki til að bæta það að yfir texctanum trónir mynd af forseta 'Irans Mahmoud Ahmedinejad yfir öllu svínaríinu.

Menn héldu eftir þessar víðfrægu Múhameðsteikningar að nú væri mál að linni, en ónei þá sprettur þessi grúppa upp, sem hefur unnið sér það helst til frægðar að hafa farið til  Balkanlandana og gert grín að serbískum lýðræðissinum sem  styðja Ratko Mladic hershöfðingja. Grínið fólst í því að hengja upp plaköt með fyndum skilaboðum. Þennan leik hefur þessi listamannahópur iðkað í helstu málum sem brenna á heimsbyggðinni.

Með þessu útspili telja þeir sem næst standa málefnum 'Irans að þetta muni skapa enn meiri hatur á dönum, og jafnvel beinast gegn þeim sem virða menningarheima annarra ríkja. Einn af þeim sem hefur tjáð sig um þetta útspil, er´íranskur vísindamaður við  Háskólann í Aaarhus, en að hans mati er orðaval listamannahópsins frekar óheppilegt. Annar tekur í sama streng og segir að orðið svín sé gjarnan notað til að svívirða múslima.   Það valdi ekki neinni umræðu aðeins reiði að nota slíkt orð.

Þrátt fyrir þessa auglýsingu vona menn að hún skaði ekki hagsmuni dana eins  og múhameðsmálið, og telja að þar sem lesendahópur Teheran Times sé frekar lítill, aðallega  diplómatar og útlendingar, að skaðinn verði ekki eins mikill og kröftugur og múhameðsteikningarnar ollu á sínum tíma. En þó taka þeir öllu með fyrirvara, enda dönsk framleiðsla og fyrirtæki ekki vinsæl sem stendur í Arabalöndum.

Að mati listamannahópsins finnst þeim þetta hafa skilað jákvæðri umfjöllun og þeir telja að sjálfur Mahmoud hafi húmor fyrir slíkum uppákomum, og telja að þetta muni ekki valda miklum skaða, tilgangurinn hafi fyrst og fremst verið sá að setja af stað háð þar sem almenna umræðan er kæfð af orðfæri ríkjandi valdhöfum vestursins, í þá umræðu skorti háð og léttleiki.

Hilsen

Gilli

Set inn mynd af amfiteater IBM í þríviddarheimi Secondlife.

Annað líf

Hilsen:

Jæja, þá er maður kominn í jólafrí eftir góða og snarpa törn í skólanum. Nú taka við "rólegheit" en framundan er að rýna í gögn og bækur eftir fyrstu önnina, því framundan er verkefni eftir áramót sem tekur allt að þrjár vikur að vinna í. Meir um það.

Hugsið ykkur hvað það væri meiriháttar að geta skipt um líf, orðið að annarri persónu en maður er, kaupa og byggja upp hús að eigin vali og smekk, velja sér förunaut eftir útliti og töfrum, nú eða lifa hinu ekta swinger lífi. Ja maður bara dæsir af tilhugsuninni. En þetta er hægt í dag.

'I einum af pistlum mínum minntist ég á netheimalíf sem heitir secondlife.com, þar sem nákvæmlega þetta og meir sem menn eru að framkvæma á þeim vef.  En það eru feiri sem hafa uppgötvað möguleikana á þessu öðru lífi, fjarri raunveruleikanum. Stórfyrirtæki á borð við Coca Cola, Pepsi, og fataframleiðendur eru óðum að markaðssetja sig í þessum netheimi. Nú síðast bera fréttir af því að stórfyrirtækið IBM hafi keypt um 12 eyjar í secondlife, þar sem meiningin er að gera tilraunir með þrívíddarheimsóknar stað á netinu. Hugmyndin gengur út á það að geta hitt samstarfsaðila IBM og sýna þeim fram á möguleikana að byggja upp fyrirtæki á Secondlife. Eyjunum 12 er skipt upp í þrjú svæði fyrir verkefni sem IBM vinnur að, samstarfsvæði fyrir samstarfsaðila og svo tilraunasvæði þar sem hægt er að nýta gögn frá öðrum þekkingarfyrirtækjum í Secondlife.

Þegar hafa 700 samstarfsaðilar haslað sér völl í Secondlife. Stór hluti af þessum hópi nýtir sér þegar það sem netheimurinn hefur upp á að bjóða, á meðan aðrir úr hópnum eru að koma sér fyrir með aðstoð IBM.  IBM hefur þegar byggt upp risahúnsæði í Secondlife, svokallað amfiteater þar sem  hægt er að hittast og kynna sér það sem framundan er  í framleiðlsu. Þetta telja forsvarsmenn IBM skipta miklu máli í dag, þar sem samstarfsaðilarnir eru staddir víða um heim, og hinar hefðbundnu viðskiptaferðir séu óðum að hverfa með tilkomu netsins. Hægt er að hittast í amfiteater og virða fyrir sér framleiðsluna og  síðan skiptast á skoðunum innan amfiteaterins.  Þegar hafa verið haldnir slíkar kynningar og fundir og hafa gefið góða raun.

Með tilkomu þessa netheims gefst fyrirtækjum kostur á að byggja upp starfsemi sína, í þríviddarheimi og um leið rannsaka hvað áhrif slík uppbygging hefur, ekki bara til að setja inn logóið sitt, heldur til þess að skapa nýjan netheim þar sem hinn almenni neytandi getur sótt í og átt athvarf, fjarri raunverulegum ranveruleika.

Jamm, áður mér brá. Segi bara ein og Bob Dylan: The times they are a changing.

Hilsen

6 dagar til jóla

Vona að þetta ylji ykkur í niðurtalningunni. Meira seinna.

Hilsen

Gilli

Að skipta um nærbuxur

Hilsen:

Jæja, enn ein fyrirsögnin með tvíræðri merkingu. En samt ekki. Undanfarið hef ég verið að velta fyrir mér íslensku samfélagi eins og það blasir við mér, "útlendingnum". Og hverju hef ég verið að velta fyrir mér. Jú, það er hversu óstöðugt margt er í íslensku samfélagi. Tökum sem dæmi um fyrirtæki, eins og Avion Group, sem blés í mikla herlúðra á sínum tíma þegar Einskipafélag 'Islands var innlimað í fyrirtækjakeðjuna. Þá að mig minnir var talað um að nauðsynlegt væri að fyrirtækið hefði alþjóðlegt nafn þar sem það væri á alþjóðamarkaði. Mjög skiljanlegt, en svo fyrir skemmstu heyrði ég í fréttum að nú hefði Avion Group skipt um nafn, og héti nú Hf. Eimskipafélag 'Islands. Að sjálfsögðu setti mann hljóðan, enda þegar Avion Group var stofnað, þá var það stofnað til yfirtöku á flugfélaginu Atlanta og einhverjum fleiri fyrirtækjum. Og svipað má segja um 365 miðla, sem mig minnir að hafi heitið á sínum tíma Stöð2, og svo kom Dagsbrún og til að bæta meiru í þessa naglasúpu, þá var líkt og með Avion Group blásið í herlúðra þegar fréttastofa Stöðvar2 fékk heitið NFS, en það heiti varði nú ekki lengi þar sem bæði stöðin og fjármagnið gekk til þurrðar.

Nú og svo tiltækasta dæmið er stöðug ritstjórahlaup á milli blaða sem eru í fæðingu eða eru andvana. 'I þessu sambandi má nefna Reynir Traustason sem fór yfir á 'Isafold frá Mannlífi, í þeirri innkaupafléttu sem menn tengdu við Baugsmenn, og svo brotthvarf Sigurjóns M. Egilssonar úr ritstjórastólnum á Blaðinu yfir á væntanlegt síðdegisfréttablað sem ber vinnuheitið NT. Merkileg nafngift, þar sem fyrirrennari þessa nafns, var framsóknarsnepill sem átti að blása nýtt líf í kulnaðar glæður Tímans, en dugði skammt. Með ráðningu Sigurjóns átti að reyna að blása nýtt líf í annars andvana blað sem hvorki gekk né rak, þangað til Sigurjón settist í stólinn og tókst að glæða einhverju lífi í það. En svo ekki söguna meir, annað betra bauðst á næsta húshorni. Það er ekki mikið fyrir hugmyndaauðgina að fara, þegar menn leita í smiðju gamalla verkalýðsfélaga og löngu horfinna snepla til að taka þátt í hnetumarkaði auglýsinga og fjölmiðlaheimsins á 'Islandi. Og til þess að taka þátt hlaupa menn á milli húshorna bara til að taka þátt í einhverju, með einhverjum sem á pening, bara til að sjá hvort dæmið gangi upp eða ekki. Og ef það gengur ekki upp þá stofna menn annað blað í samstarfi við aðra sem hafa hlaupið á milli húshorna til að leita að einhverjum sem er til í að stofna blað með einhverjum sem á pening. Minnir mann á hrunadansinn fræga í Flóanum.

'A mannamáli heitir þetta, að menn skipta oftar um kærustur en nærbuxur. Þannig blasir það við mér allavega.

Segjum það að sinni. 'I nótt, á klakanum kemur fyrsti jólasveinninn til byggða. Væri ekki verra ef þessa jólastelpa guðaði á gluggann hjá manni til að setja í skóinn.

Hilsen

Gilli

17 dagar til jóla

Hilsen:

Enn sem fyrr gleymir maður sér við ritun langra texta. Hér kemur jólastúlkan og hún ræður sér varla fyrir kæti.

Og hefst þá lesturinn

Hilsen:

Þarsem maður er smátt og sígandi að renna inn í danskt samfélag, eða allavega að reyna að læra og skilja danskt samfélag, þá náttúrulega samkvæmt gömlum vana les maður blöðin reglulega. Helstu blöðin eru Jyllandspósturinn, Politikken, og svo fríblöðin, Urban og 24 tímar, sem manni skilst allavega að haldi enn velli, þrátt fyrir "stórsókn" Nyhedsavisen, sem er víst að auka við sig.

Helstu fréttirnar þessar dagana er heimildamynd sem fjallar um þátttöku dana í  stríðinu í 'Irak og Afghanistan. 'I þeirri heimildamynd, sem heitir Det hemmelige krig,  er haldið því fram blákalt að Anders Fogh Rasmussen forsætisráðherra hafi logið að þjóð sinni um tilveru og tilvist dana í stríðinu. Þar er einnig haldið því fram að danir hafi margoft  aðstoðað við að taka til fanga hópa af "grunuðum" Al Kaida liðum, afhent þá til bandarrískra hermanna, sem síðan hafi barið þá og niðurlægt, og er eitt tilfelli rakið til þess þar sem einn af þessum föngum hafi látist eftir barsmíðar og verið skilinn eftir hangandi í keðjum yfir nótt. Einnig er vísað til "lyga" Rasmussen sem segir að danir samþykki ekki illa meðferð á föngum samkvæmt Geneva-sáttmálanum.  Annað kemur fram í heimildamyndinni, og hefur Anders Fogh sætt harðri gagnrýni, enda berst hann og hans flokkur fyrir áframhaldandi setu, þannig að þessi heimildamynd er talin geta verið jafnmikil púðurtunna og tamílamálið sem velti ríkisstjórn úr sessi á sínum tíma.

'A heimaslóðum, nánar tiltekið í Esbjerg hefur risið stórmerkilegt mannvirki. Um er að ræða einn af heimsins stærstu  olíuborpöllum sem reistur hefur verið. Olíuborpallur þessi mun þó ekki verða dreginn strax á olíuauðlindirnar, heldur er ætlunin að nýta hann til að mennta þá mörgu sem áhuga hafa á vinnu um borð á olíuborpalli. Enda er kennt í skólum víða um Danmörk, teknisk offshore managing, þar sem vinnan felst í stjórn og starfsemi olíuborpalla. Hugmyndin að þessum olíuborpalli er komin frá atvinnulífinu, skólum, og um leið forsvarsmönnum ferðaþjónustunnar, til að marðaðssetja Esbjerg sem bæinn þar sem hlutirnar gerast á tæknivæddan hátt. Þegar maður bregður sér í bæinn þá kemst maður ekki hjá því að sjá þetta 150 metra stálvirki gnæfa yfir öllu í hafnarmynninu. Þetta mun vera eitt útspilið til að koma Esbjerg á kortið aftur, þar sem sjómennska og fiskvinnsla er svipur hjá sjón miðað við áratug eða svo aftur í tímann. Fyrir áhugasama þá geta þeir kíkt á þessa heimasíðu, www.oilrig2esbjerg.dk

Danir kalla ekki allt ömmu sína í hinum ýmsu málum, hvað varðar frjálslyndi. Nýjasta nýtt er að nú er leyfilegt að stunda kynlíf með dýrum. Eftir fund dýralækna, prófessora, og ráðgjafa hjá hinum ýmsu stofnunum sem málið varðar, þykir ljóst að leyft verður að stunda dýrakynlíf og jafnvel kaupa þá þjónustu. Þegar eru fyrir "vændishús" sem selja aðgang að dýrum, og einnig geta menn keypt sér þá þjónustu á netinu. þegar hafa verið sett lög sem varða slíkt athæfi, þar sem kveður á að leyfilegt er að stunda kynlíf með dýri svo lengi sem tillit er tekið til  dýrið sé meðhöndlað af ýtrustu nærgætni, og að dýrið verði ekki fyrir áverkum, þjáningum, hræðslu og og óþægilegri reynslu.Þar að auki er leyfilegt að taka upp og selja myndir af dýrakynlífi.

Það er ekki að spyrja að dönum, og nágrannar þeirra, norskir sem sænskir lýsa yfir miklum vonbrigðum með afstöðu ráðsins, sem menn vonuðust til að mynda taka heilbrigða afstöðu málsins, en annað hefur komið á daginn.  Menn vísa til þess að þetta sé jafn gáfulegt og að banna barnaklám, en leyfa barnaníðingi að búa óareittur á heimili sínu og stunda athæfi sitt.

Ja, heimur versnandi fer.

Hilsen

Gilli

Þynnkubíó

Hilsen:

Jæja þetta er einn af þessum frægu næturpistlum, þegar maður vaknar eftir að hafa velt sér nokkra snúninga í rúminu. Lítið hefur borið upp á síðustu daga, nema velheppnaður jólamatur þann 1.des síðastliðinn í skólanum, þar sem komið var saman í sameiginlegan jólamat, sem samanstóð af svínakjöti, rækjum, kjötbollum, og ýmus öðru girnilega. Þrátt fyrir góðgætið vantaði sósur með þessu öllu saman, og þá sérstaklega svínakjötinu. Fyrir vikið varð kjötið frekar þurrt. En þrátt fyrir þetta var kvöldið vel heppnað og kom sérstaklega í ljós hve vel bekkurinn minn hefur náð vel saman, að menn og konur skemmtu sér vel og innilega saman.

Það er alltaf einkennandi að eftir svona skemmtanir vaknar maður daginn eftir frekar rislágur og slappur til allra verka. Því gat ég ekki annað en brosað út í annað í fyrradag þegar é glas um ferska nýjung í dönsku félagslífi. Hver kannast ekki við það að vakna á sunnudegi t.d eftir ærlegt og gott fyllerí, og fyrsta hugsunin sem kemur í hugann er vafalaust tengd mat eða vökva. Eflaust síðsta hugsun er sú að bregða sér í bíó, nema þá seinna um daginn, ef timburmennirnir hafa hætt slætti sínum.

'I Kaupmannahöfn hafa tvær framtaksamar konur sett af stað svokallað þynnkubíó, og þá sérstaklega miðað við sunnudagana.  'I bíóinu Öst  fyrir framan veitingastaðinn Paradís hafa þær komið fyrir dýnum og svefnpokum. Á borðunum á veitingastaðnum hafa þær komið fyrir  svokölluðum "brunch" diskum, og fyrir 60 dkr fær maður brunch og bíó og eftirá getur maður haft það huggulegt á dýnum og horft á bíóið. Nú ef svo ber við að einstaka akútt-tilfelli ber upp á varðandi yfirþyrmandi þynnku, þá er boðið upp á vatn og panodil til að stemma stigu við frekari þynnku.

Fyrsta keyrsla á slíku þynnkubíói, eða Sunnudagar í Paradís eins og það hefur verið kallað var einmitt síðastliðinn sunnudag, enda má segja að 1.des hafi verið mekka jólahlaðborðanna. Að sögn beggja kvenna sem fengu þessa hugmynd þá voru þær orðnar leiðar á því að hanga þunnar og frekar rislágar til allra verka og hrintu því þesarri hugmynd af stað til bóta fyrir aðra sem svipað var ástatt um.

Hugmyndin virðist hafa fengið ágætis brautarfylgi, því að þó nokkrir "sjúkir" einstaklingar mættu í brunch á tilsettum tíma, og eftirá voru ræmurnar, Nightmare before Christmas og Science of Sleep sýndar.

Frekari áform um þynnkubíó eru þegar á veg komnar, og gera þær stöllur ráð fyrir öðru þynnkubíói þann 7.janúar n.k., enda góð og gild ástæða til, nýtt ár hafið með tilheyrandi kreditkortaþyngsli framundan eftir jól og áramót. Því ekki að gleyma sér um stund fjarri slíkum raunum með heimsókn í Paradís?

Fyrir marga væri það ákjósanlegt að geta gleymt stað og stund og horfið á vit ævintýra og drauma. Fyrir áhugasama netverja og fíkla hefur í gangi verið raunveruleikur á netinu þar sem menn byggja hús, stofna fyrirtæki, skreppa á barinn eða versla í einum af hinum mörgum verslunarkjörnum. Umræddur raunveruleikaheimur heitir secondlife.com, og verður að segjast að með tilkomu þessa "heims" hafa menn horfið á vit netheima, þar sem stofnað hefur verið netsamfélag, þar sem viðkomandi breyta um nafn og lífstíl, kaupa lóðir, höndla viðskipti sín á milli og eru jafnvel að hafa dágóðar tekjur af slíku, í raunheimum.

Nú er komið fram í dagsljósið könnun, sem gerð var í  Bandarríkjunum, hvar annarsstaðar, að 43% bandarríkjamanna, leggja að jöfnu raunverulegt líf utan netheima til jafns við hversdaglegt líf.

Samkvæmt þessu og spám sem voru gerðar þegar internetið kom fyrst fram, fyrir hartnær 10 árum síðan, hefur internetið orðið að sterku persónulegu og jafnframt  öflugu þjóðfélagsafli eins og gert var ráð fyrir í upphafi.

En líkt og hið fornkveðna segir, þá var Adam ekkilengi í Paradís, nema þá helst í Kaupmannahöfn. Hliðaráverkarnir af þessu netheimalífi og jafnframt flótta frá raunveruleikanum, hafa gert það að verkum að samtökin The World Development Movement, sem berjast gegn fátækt, hafa ruðst inn i heim netverja á secondlife. com  í þeim tilgangi að  minna þá hálfa milljón netverja sem þar þrífast á heiminn utan netheima. Með þessu móti vilja samtökin vekja athygli netverja á þann fjölda barna sem látið hafa lífið síðan 2003 þegar secondlife.com var stofnað.  Með þessu móti telja þau tilganginum náð að minna á að það er ekki endalaust hægt að flýja heimsins vandamál í netheimum, fyrr eða síðar standa menn andspænis vandanum.

Ekk veit ég hvort er betra, að leysa vanda sinn með góðu þynnkubíói, eða að hverfa á vit netheima, en eitt er víst, Adam er sjaldan lengi í Paradís.

 Hilsen.